‘Task Force Yuletide Season’ andam na sa bag-ong tuig

Sinulat ni Fred B. Dellava, Associate Editor

CAGAYAN DE ORO CITY- NAKAANDAM na ang mga miyembro sa gimugnang Task Force Yuletide Season’ alang sa pagpatuman sa kahusay ug kalinaw sa pagtamod sa katawhang Pilipinhon sa pagsugat sa bag-ong tuig 2013, ning siyudad.

Si Konsehal Ian Mark Nacaya, committee chair sa police, fire and public safety sa konseho sa Cagayan de Oro nahinabi sa Mindanao Star Balita (MSB) mibutyag nga ang task force gipangulohan mismo ni City Mayor Vicente Emano diin nagtinguha sa mabulukon ug malinawong pagsaulog sa bag-ong tuig.

Lakip matod niya sa maong task force ang kapolisan, kasundalohan ug uban pang gitahasang ahensiya sa gobiyerno sama sa Department of Health (DoH) nga mo-abag unya sa posibleng emerhensiya nga mahitabo.

Si Nacaya midugang nga una pa ang kasaulogan sa pasko nagpagawas na og kamanduan ang mayor kalabot sa kamugnaan sa maong task force.

Sa laing bahin, makatabang usab og dako ang koordinasyon sa katawhan karong pagsugat sa bag-ong tuig, butyag ni Police Regional Office 10 Director Chief Supt. Gil Hitosis.

Matod niya, kulang gayud ang ihap sa kapolisan aron matubag ang tanang panginahanglanon sa katawhan ilabina sa pagparesponde sa unsa mang kagubot unya nga mahitabo.

Nasayran atol sa kasaulogan sa pasko dinhi sa siyudad, walay gikatalang dakong krimen ang kapolisan gawas lamang sa pipila nga nagpabuyag ug mga nabuthan sa pabuto.

Nanghinaut usab ang DoH sa rehiyon 10 nga walay mabuthan sa dagkong mga pabuto ning pagsugat sa bag-ong tuig.

Si DoH-10 spokesman Jun Galban niingon nagpadayon ang ilang hugot nga kampaniya batok sa iligal nga mga pabuto.

Gani, ning adlawa, gikatakdang sunugon ang tanang gipangsakmit nga mga illegal firecrackers gikan sa nagkadaiyang merkado sa dakbayan.

Login

Welcome! Login in to your account

Remember me Lost your password?

Lost Password