Gobernador midapit sa NBI pagbutang ug ‘service office’ sa Bukidnon

Sinulat ni Ruby Leonora R. Balistoy

MALAYBALAY City, Bukidnon–Giaghat ni Gobernador Jose Ma. R. Zubiri Jr. ang kadagkoan sa National Bureau of Investigation (NBI) sa pagbutang og “extension office” sa probinsya sa Bukidnon.

Kini, human niya nakita ang rekord ug talaan sa “socio-economic profile” ilabi na sa mga serbisyo nga anaa andam kanunay alang sa katawhan panahon sa panginahanglan.

Atol sa pakighinabi, si Zubiri miingon nga gi-aprubahan na ni Department of Justice (DOJ) Secretary Leila De Lima ang iyang hangyo nga magbutang ug ‘extension office’ sa NBI sa probinsya sa dili pa matapos ning tuig, aron maserbisyuhan kadtong mga taga layo nga lungsod diin moadto pa sa Cagayan de Oro aron lang makakuha sa “NBI Clearance.”

“Gikinahanglan gayud nga magbutang sila (NBI) sa bisan lamang ‘extension office’ dinhi sa probinsya tungod kay atong nakita sa rekord nga kapin 200 ka mga aplikante matag adlaw ang ga-adto sa Cagayan de Oro City aron lang makakuha sa maong papeles. Walay pa gani kini’y lakip sa kahasol nga ilang matagamtam diin kinahanglan pa sila nga mobalik pagka-ugma o ba kaha sa sunod nga pipila ka mga adlaw kung ugaling aduna silay kapareha ug pangalan nga naay ‘criminal records,” matud sa gobernador.

Ang ‘NBI clearance’ karon pwede na maproseso ug makuha ‘online’ apan kadaghanan sa taga layo nga dapit mas gipili sa ‘walk-in’ nga paglukat niini tungod kay duna usab usahay limitasyon ang pag ‘access’ sa internet, midugang siya pag-ingon.

Si Ricardo A. Diaz, ang NBI Director sa North Eastern Mindanao Regional Office kon NEMRO miingon nga tungod kay ang NBI Clearance nahimo nang usa ka importanteng kabahin sa atong panginabuhi, ga-anam ug kadaghan ang galukat niini matag adlaw diha sa atong rehiyonal nga buhatan.

Busa, kon ugaling makapahimutang kita ug sanga’ng buhatan kon “service office” sa Bukidnon, makulang-kulangan na usab dayon unya ang gidaghanon sa listahan ug ang pagpunsisok sa mga ‘clearance claimants’ matag adlaw diha sa atong rehiyonal nga buhatan, si Diaz miingon.

Ang NBI clearance usa sa mga pinaka importante nga kinahanglanon alang sa pag-aplay ug trabaho, pagpa-enrol sa usa ka tulunghaan, pagkuha ug ‘Visa’ aron maka-‘abroad,’ pagkuha sa ‘employment record’, ug bisan sa pagkuha sa SSS, ‘passport,’ ug uban pa.

Ang mao’ng NBI nga papeles nagpamatuod nga ang usa ka tawo walay ‘criminal record’ ug walay kalambigitan sa bisan unsa’ng kaso ug obligasyon.

Post Author:

Leave a Reply